عسى الحيا يسقي ظَهَرة البديعه
من مزنةٍ غراً تنثر مطرها
دارٍ حَوَت راع العيون الوسيعه
خلٍ عمر حالي وحالي دمرها
الجادل الريم الجفول التليعه
يموت قناص الضبا ما قدرها
بالوصل تاعدني وتبدي قطيعه
مدري طبع وإلا التغلي جبرها
الله وهبها من جمال الطبيعه
ما حطت الحمرة وقصت شعرها
تاخذ من الزين الصفات الفظيعه
سود العيون وبيض لبة نحرها
والخد براقٍ تكاشف لميعه
يسرق من عيون المولع نظرها
يا عين خرّسن فوق راس الرفيعه
شيهانةٍ راع الولع ما صقرها
من الشرف تسكن حصونٍ منيعه
ريميةٍ صفق الهبايب ذعرها
يا ليت من هو تحت حكم الشريعه
يظفر بيدها حظ من هو ظفرها
قلبي لها ضامي وكبدي جويعه
مير البلا حجّارها اللي حجرها
ليست هناك تعليقات:
إرسال تعليق