يا زارع المعروف في جاحد الطيب
يموت زرعك لو سقيته بدمك
اللّاش لو توفي معاه المطاليب
لا تامنه يجحدك والا يذمك
☀☀☀
ياكثر خلان كيف الحال وشلونك
خلان جلسة رخا دلة وبرادي
ناسٍ ليا ضاقت الأيام بعيونك
نسو حقوق الخوي والملح والزادي
☀☀☀
ما يجرح الرجل ويبيّح خفى سده
إلا طعون الغدر من صاحبٍ غالي
لا جات من واحدٍ يحسب من البده
اما ولد عم وإلا من ولد خالي
☀☀☀
راع النميمة ما احسبه ضمن الاصحاب
يعني صلاتي ما تشابه صلاته
أحسن لي الصدة عن قشيعة الداب
ما دام فيها الداب يقلب لهاته
☀☀☀
أنا رصيدي خوّة الطيّب فقط
المحزم اللي فالشدايد ممتلي
وإلا الردي حطيت فوق اسمه نقط
ما هوب من ربعي ولا هو من هلي
☀☀☀
أسعى مع الدنيا ولا أدري عن الغيب
ولولا الأمل محدٍ تعدى محله
☀☀☀
نموت لكن ما تموت الكرامات
كرامة الرجال هي راس ماله
لعيالنا محنا نورث عقارات
مورّثين الطايله والجماله
☀☀☀
فعل الجمايل صعب ويشيّب الراس
لكنه أصعب منه رد الجمايل
واذا سبقك بطيب واحد من الناس
ما يلّحق بالفعل راع الاوايل
☀☀☀
الواسطة غطت على كل قانون
خلت رخوم الناس مثل الذيابه
حتى العمى فالواسطة ركب عيون
يعني حقوق الناس راحت نهابه
☀☀☀
العيب ما هو ترك بعض المواجيب
بعض الظروف تخون راع الشهامه
العيب فعل الطيب في راعي العيب
انشهد إنه عيب وأكبر رخامه
☀☀☀
حب المظاهر غير عن حب الظهور
لو كل كلمة مستمدة من ظهر
يا فلسفة شاعر سبح سبع البحور
ولا ملى عينه من السبعه بحر
☀☀☀
إذا حضرنا تختفي كل الأسامي والوجيه
وإن كان غبنا ما حدٍ يقدر يسد غيابنا
لو حاول يشوّش علينا راعيَ العقل السفيه
يبقى الشداد اشدادنا تبقى الركاب اركابنا
☀☀☀
لكل جرحٍ دوا ولكل جرحٍ ضماد
إلا الكرامة تموت وجرحها ما برا
وش خانة الدلة الصفراء بليا قناد
لو كان يبرالها العنبر مع المبخرا
☀☀☀
لو كل كلمة عارضتني مع الخط
اخذت احللها من الألف للياء
شابت تفاكيري من الشيل والحط
وتعبت مع عوج النوايا والارياء
☀☀☀
قمة جمال الرجل في ماقف الطيب
ما هوب في زود الحلا والوسامه
إما طلع ذيبٍ يسد المواجيب
وإلا برك بين الردى والرخامه
☀☀☀
ما تنفعك كثر الأسامي والوجيه
هياكلٍ من دون وقفة صامله
يغنيك عن كل العرب رجلٍ نبيه
في ماقفه يسوى قبيلة كامله
☀☀☀
اما رفيقٍ فالشدايد سنافي
وإلا الرخا كلٍ تشيله عظامه
خذ علم مني يا أبيض الوجه وافي
مصاحبك من لا يحشمك رخامه
☀☀☀
حنا جعلنا من الحمقى مشاهير
وأصبح لهم بيننا مركز زعامه
وأظنها تعتبر في الوقت الاخير
علامةٍ من علامات القيامه
☀☀☀
من منطلق أنّ التجارب راس مال
احكم على الرجال بعد التجربه
اما طلع في ماقفه مضرب مثال
والا يجي عكس المثال ومضربه
☀☀☀
لو كل زلة رفيقٍ قمت أحسّبها
والله ملقى الرفيق اللي يخاويني
اغض عيني عن الزلة واصد ابها
لو شفت في صاحبي ما تكرهه عيني
☀☀☀
ياكثر ناسٍ ينكرون العشره
خلان دام الوقت جوّه ساكن
وقت الرخا فيهم بياض البشره
وقت القسا فيهم سوادٍ داكن
☀☀☀
