الموت من ذنبٍ نسيته لكن الله ما نساه
سليت مع درب الامل واطرد ورى دنيا الغرور
نعيش غفله فالزمن والوقت تطحنا رحاه
نسكن قصورٍ فارهة وآخر منازلنا قبور
والآدمي ما يهتدي إلاّ إذا ربي هداه
يطيش عيشٍ فالترف ويعيش طيشٍ فالشعور
يغرّنا وجه السراب ويشبهه وجه الحياه
اما غيابٍ منفرد وإلا غيابٍ في حضور
في حزةٍ ما تعترف في ليت وإلا يا عساه
لا دقت الساعة صفر ما فيه جسرٍ للعبور
لا وقّفت مثل العظم فالحنجرة وقت الوفاه
ما عاد ينفع لا طبيب ولا استشارة من يشور
ياالله عفوك لا وصل عمري إلى آخر منتهاه
في ساعةٍ تقصر بها شبور وافين الشبور
ويالله لطفك فالقبر إذا بنو فوقي حصاه
اما سلام الله دعاء والا دعاءٍ في ثبور
ويالله سترك يا عظيم الشان يالله النجاه
فاليوم الأكبر يوم نفخ الصور في يوم النشور
يوم الحشر والناس في ميقافها حفاةٍ عراه
لا باح مكنون الضمير وبان ما تخفي الصدور
لا واسطة تنفع ولا مرْكز ولا مالٍ وجاه
إلا العمل من بعد لطفك يا رحيم ويا غفور
يا رب عبدك جاك يسحب لك من الذلة خطاه
واقف على بابك ويرجي من ضياء رحمتك نور
ليست هناك تعليقات:
إرسال تعليق